Galerie (2 Bilder)

Stolz dürfet wir en de Gmoida sei‘ auf onsre rührige Obst– und Gardabauverei‘, schaffet, helfet, wirket mit, dass onsre Gmoida bleibet zukunftsfit, Stauda, Baim ond Blumaschmuck, mit de‘ Obstler goht a‘ Stuck, für’s Obscht händ’se grad so a‘ glücklich’s Händle, brenget au‘ en leckra Flada en’s Pfännle, wenn dann d’r Moscht für Körper, Geist ond Seel‘ no‘ schmeckt, isch d’r Frieda‘ en de Familia perfekt. Ihr älle seid d’r greene Dauma‘ en de Gmoida ond Städt‘, es dät viel Kultur fehla‘, wenn Eich a‘ Schuldes net hätt‘, gebet de‘ Ortsbilder stets a‘ freindlich’s Gesicht, onsre Obschtler em Ländle send oifach a‘ Gedicht, vielleicht hat’s au‘ d’r Kretschmann in Stuagard scho‘ kapiert, onsre Obst– ond Gardabauverei‘ wisset seit 150 Johr, wia greena Politik funktioniert, au‘ ohne Gutachda ond Wissaschaftler wisset Ihr ganz genau, was de‘ Pflanza guat duat, denn Ihr seid oifach schlau, Obschtler send Macher ond Gestalter onserer Kulturlandschaft, gemeinsam mit de‘ Landfraua, Brenner, Imker ond Baura seid Ihr a‘ klasse Mannschaft, sorget stets en onsre Gmoida für a‘ greena Schau, ond des net bloß zu Zeida d’r Landesgardaschau, dafür an Eich mei‘ ganz großer Dank, für ons Gmoida seid Ihr a‘ ganz starka‘ Bank, Ihr seid Heimatschützer mit Verstand, des sagt mir d’r g’sonde Menscha’verstand, es griaßt Eich diesmol aus Wißlenga ganz nett, Schuldes Michael Rembold aus Waldstett‘.

Michael Rembold